坊間唔少教人炒股嘅書，成日都叫人唔好貪心。炒得股嘅點會唔貪心？點會唔想隻股升多啲。準確啲講應該話炒股要有紀律，識得止賺，最多都係話唔好太大貪。識得炒一定要得一想二，即係話手上嘅股升咗就要諗定有冇一隻差唔多概念而又未升得晒嘅股。
食住滬港通條水，好多隻券商股都炒到㷫烚烚，但仲啲細嘅可追落後。結好（064）噚日升約半成，相信仲有得去！滬港通快到，唔少內地券商為落香港食大茶飯，都傾向收購間香港券商作為盲公竹。結好於香港經營廿幾年證券業，你話有乜可能冇人考慮收購佢先？收購憧憬外，結好先排向銀娛（027）出售澳門金都酒店及賭場業務，現金代價32.5億元，上月已收26億元，下年1月收埋尾數6.5億元。你再望埋結好市值，而家只係16.55億元，單係cash已係市值嘅兩倍！
睇埋PB你就知結好真係博得過，敦沛（812）停牌前PB係4.2倍、時富（510）PB係2倍、第一上海（227）係0.9倍，咁結好呢？到而家先係0.5倍咋陰公。唔好話炒到去2倍PB咁大貪，當炒到去1倍PB吧，股價起碼上返去0.8元先至啱數。另新華滙富（188）亦可留意，公司幾乎所以證券經紀牌都拎齊，而大股東新華集團主席蔡冠深，既係政協，又係中華總商會永遠名譽會長，與內地關係好，相信會於各方面受惠滬港通。
Fifi
http://www.facebook.com/lovefrystock
本欄逢周二、四刊出