講真，孫柏文有冇好似好多人咁，成日抽陸東水？有。每次被邀做講座嘉賓，如果講到冇嘢講時，我會話blue sky未？
點都好，我同佢都要估未來，呢樣嘢係極難，所以我雖抽水，不過亦知自己也會被抽，每次攞blue sky來笑，都係有同情及同感。今日講呢啲，係因為陸東又發功，話個市好難穿25000點。
你問我，其實我今輪冇陸東咁大膽。我唔咁講乜嘢指數會去或去唔到幾多點，我就係唔參與今次嘅升浪。有啲人話升市唔買好嘥，我只覺得唔識時，寧願唔賺。
大陸債務泡沫問題，係反映成個資本分配系統唔work，將辛辛苦苦儲起嘅資本掟入去會被焚毀、被貪去。放出嘅債對經濟百分比，已經直迫啲爆煲國，大陸越遲搞掂，就爆得越大鑊。
你話擺平大陸個信貸泡沫，只要答到呢條問題就得，就係啲人走數邊個孭？睇青姐胡孟青講銀行業引入民資唔簡單，我完全同意，因為係咪俾啲民資蝕、賺、控制權先？三樣缺一冇得搞。
跟住仲有外國。歐洲發現，原來你係又救唔係又救啲應該執笠嘅銀行，就會令啲原本放錯貸款畀人嘅銀行家，有更多資本去輸。救完可以再救。嗰間葡萄牙第二大嘅聖靈銀行，根本唔係乜嘢個別事件，全歐洲都係呢啲你推幾多錢入去，都係會幫你輸晒嘅資本焚化爐。而家就睇吓邊個要一齊輸錢，同埋有冇擴散。
睇唔透點解熱錢湧入
美國就出現最經典跌市前迹象，即啲高風險公司出嘅債券息口係咁升，即債券價跌，不過個股市就係咁升。一萬次出現，一萬次都要股價追債價。
如果咁多利淡因素，點解唔買跌呢？就係因為我睇唔透點解金管局日日印港幣去接外來湧入嘅錢，點解會咁多錢來？為乜？香港有乜嘢咁吸引，定係出面就來會打風？定係俄羅斯啲有錢人調錢來？所以都係嗰句，我唔知25000點係咪見頂，不過佢再升都冇我份，我候機買跌。
孫柏文
獨立股評人
http://facebook.com/shuen
本欄逢周二刊出