由陳方安生牽頭成立嘅「香港2020」，成員之內猛人唔少，包括前行政及立法兩局議員李鵬飛，但原來飛哥已經喺上個月悄悄退出「香港2020」！八方問過飛哥點解，佢話見到有傳媒話陳太收過壹傳媒肥佬黎嘅捐款，而自己又擔任緊時事評論節目嘅主持人，為免身份角色有衝突，所以自行向陳太請辭，仲話唔多贊成陳太不斷外訪講政改。
回復自由身，飛哥做嘢可以少咗啲框框，最近就政改方案提出新建議，話特首參選人要宣誓擁護《中國憲法》，令中央安心，普選就會開綠燈！飛哥話，唔係因為聽到北京有此傾向而搶飲頭啖湯，只係想搵個方法令政改方案獲通過，因為香港已經因為政改搞到好分化，長此下去一定會撕裂，仲話鍾士元都大讚佢度到條好橋喎！