保皇黨日日都有反佔中「運動」，但建制派反佔中都應該好好準備台詞，唔好亂噏一通，學卿姐話齋，架係自己攞嚟丟。噚日又嚟一班新界區青年團體加入周融嘅反佔中大聯盟，主持叫團體代表發表「反佔中之我見」，香港中山青年協會副主席陳昭昭話，佢個團體反佔中，係要宣揚孫中山嘅博愛精神。
吓！連孫中山都搬出嚟反佔中，孔子還會遠嗎？和平佔中強調非暴力，但孫中山當年「妨礙」滿清政府依法施政，武裝起義，又槍又刀，最後仲革命成功。八方反問陳昭昭，點睇呢種孫中山推翻腐敗滿清政府嘅精神，點知佢話冇補充。
周融擋駕話今日唔係講歷史問題，又提醒八方記住寫佢點講鬧黎智英喎。周融話，冇乜傳媒報道反佔中嘅聲音，好多報紙專欄作家都叫人佔中，俾人霸晒啲地盤。但明明大部份傳媒已歸晒邊，點解仲話傳媒唔幫佢呢？佢牛頭唔搭馬嘴話，如果要講證據，要睇吓黎智英捐錢畀泛民嘅證據，堅持唔答問題。周融強調，無意參加日後任何選舉同加入政府，又話佢已經64歲。
另外，反佔中大聯盟噚日喺大遊行記者會期間，唔知係咪撞邪。周融話，已聯絡咗八個統計機構團體嘅負責人，請佢哋幫反佔中遊行點人數，其中一位成功聯絡到、但尚未答覆嘅，係已經離世三年多嘅理大教授鄭之灝。嘩，好邪呀！