林柏特（圖）離開車路士，本獲「英雄式歡送」；但日前落實借返敵對球會曼城，消息未落實前已有球迷㷫到燒波衫，如果9月尾曼城對車路士林伯落場，氣氛有幾火爆可想而知。
老實講，打工仔有幾可一世只打一份工？不過，轉工時多數希望「好嚟好去」。像林伯的例子，就似係有選擇地「好嚟唔好去」；咁多球會揀，點解林伯唔跟隊友韋拿借去澳職，而特登揀借返曼城？曼城本身咁多中場，又點解特登要借返一位已年屆36的死敵舊將？會否是林伯根本在車仔未能獲得滿意合約而懷恨在心、曼城則「成人之美」，促成這宗象徵反面的交易？
有些「好嚟唔好去」則算是「無可避免」，如熱刺前任教頭舒活。如果不是波亞斯無能被炒；如果他一直沒接任熱刺領隊，繼續做已擔當了5年的助教工作，可能他可一直留在熱刺多5年、甚至10年！而不用像現在，升職了，卻反而留得半季便不歡而散。連他自己都話：「如果早知得5個月，我寧願唔接任做領隊！我以為起碼會有18個月給我重建熱刺。」事實上，他是熱刺近年領隊中得勝率最高的一位。但從他的角度而言，有得升唔通唔升咩？從管理層而言，其急進和缺乏耐性，應是「有得揀」的。新官普捷天奴，唔知有冇同老闆「好嚟好去」嘅福份？
方柏翹
now足球評述員