無女仔唔緊張自己肌齡，特別係做幕前。近期肌齡測試越嚟越hit，繼上山詩納囡囡Hilary，同電眼女神官恩娜，今集我哋大晒冷，請咗3位靚女紫盈BB、Evelyn同倪晨曦Elva做肌齡測試，講明肌齡最後生嗰個會有一年免費神仙水。
但上得動新聞邊有咁簡單，喺比拼肌齡之前，我哋先用假肌齡結果整蠱幾位。經過節目組精心佈署，加上動主播Jasmine同攝影師嘅精湛演技，令現場wee嘩鬼叫，三位女星成功被嚇至花容失色！
Elva一見假結果係60歲，即刻嚇到嘟嘴皺眉，苦苦哀求動主播Jasmine：「可唔可以唔出呢個（肌齡結果），好樣衰呀！」慘慘豬囉！皆因Elva早排去完馬爾代夫旅行曬黑咗，令佢自信心直線下降，徹底被整蠱！
接住輪到見慣大場面嘅紫盈BB，唔知佢發現被整蠱會唔會喊呢？Jasmine先用8歲假肌齡令佢自滿，再用39歲「真」肌齡嚇窒紫盈。紫盈BB當然無喊啦，不過就大叫：「39歲呀！我真係要檢討吓啦！」然後補充：「我會迫你用8歲（肌齡結果）呢個！」
好戲在後頭！活潑的Evelyn未坐定就自投羅網，話要試部肌齡測試儀：「我怕我肌齡有80歲呀！」節目組見佢一臉擔心，實在「於心不忍」，唔整蠱你認真對唔住觀眾！35歲結果一出，Evelyn喊晒口大叫經理人，Jasmine仲放大佢嘅皮膚問題，令佢激動到話要反枱添！Evelyn得知自己被整蠱後扁嘴：「我想喊呀！」然後二話不說撕爛假結果：「你地成功整蠱到我啦！」
特約報道
