天主教香港教區原定噚日安排候任輔理主教楊鳴章出嚟講政改，點知八方同成班行家去到，先知楊鳴章「放飛機」，臨時頂上嘅天主教社會傳播處主任馮一鳴話，楊鳴章臨時要去同教廷駐港代表開一個好緊急嘅會，處理有關升主教嘅手續，搞掂即晚就坐飛機去羅馬，又話個呼籲本身無文稿，有需要嘅話先會整畀大家。記者行家為甩底事件好激氣，不過八方就覺得件事另有別情，唔係公關災難咁簡單。
硬住頭皮頂上嘅馮一鳴話，教區認為政改嘅討論已經時間無多，呼籲各界繼續傾、努力傾同傾快啲；行家問佢點傾，佢話傾得「唔夠多，唔夠深，具體行動唔夠」；問佢教區點評估目前形勢，佢叫大家睇番採訪通知、教區舊年7月嘅呼籲，又九唔搭八咁話，可以同大家坐低傾吓天主教教理同牧職憲章。
馮一鳴唔知高層搞乜鬼
馮一鳴仲話，過去呢一年，社會焦點去晒政改同佔中，唔記得咗民生議題，如果現場記者入咗紙抽居屋、申請公屋同安老院床位，就知道逼切性喺邊度，唔應該將焦點放喺要唔要篩選呢啲話題上喎。
八方相信，馮一鳴之所以遊花園，唔係純粹護主咁簡單，而係佢真係唔知教區高層搞乜鬼。據八方所知，教廷駐港代表噚日根本唔喺香港，咁楊鳴章究竟見咗邊個？教區高層其實早喺上個禮拜已經draft好成份文件嘅內容，仲畀埋律師睇，入面提到教區對公民提名嘅睇法，原本預計噚日公佈，今日登報，但𠵱家成份嘢唔出街，相信唔係香港教區高層嘅決定，而係受到更大嘅「外力」阻止，至於「外力」係乜嘢，八方就真係唔知嘞。
李八方
mailto:[email protected]