特首梁振英帶頭簽名反佔中，佢又係全港大學校監，唔知大學校長有冇簽名壓力呢？城大唔敢答，校董會主席兼「梁粉」胡曉明就早喺七月同老婆一齊簽咗名反佔中，八方聽聞校長郭位唔係好有衝動去反佔中，總之城大上下，簽同唔簽都有壓力啦！
港大同中大校長都話，自己做啲乜，都會被人認為係代表學校，所以唔會對政治議題表態，費事影響港大同中大政治中立嘅形象。八方聽聞，嶺大校長鄭國漢冇簽名支持或者反對佔中。
咁大學會唔會叫同學去簽名反佔中先？間間大學都話要維護言論同學術自由，唔會作出干預。港大話從來唔會就個別政治議題，向同學發出具有取向及立場嘅公告或聯署活動；科大話唔會呼籲學生表態；浸大話校方不宜表達任何意見；教院話唔推動亦唔阻止；理大冇計劃叫人簽名；嶺大最民主，話校方冇權查詢同學行使公民權利嘅情況。