嘩！天降異象，好大個冇着衫嘅C朗，好大嘅胸肌，好壯嘅腹肌，仲有好粗嘅……嘿嘿，咪大腿囉！星期日晚，超巨型嘅皇家馬德里球星基斯坦奴朗拿度（C朗）突然出現喺歐美7大城市，每個C朗都成棟樓咁高，剩係着條底褲，男人見到會嚇親，女人見到會尖叫，究竟發生咩事？
投射地標外牆
放心，唔係有怪獸扮C朗，更唔係C朗星人襲地球、呼籲人類速速歸降，只係C朗幫自己嘅內褲品牌賣廣告。廣告用上投影技術，將自己個樣放映喺紐約、倫敦、柏林、巴黎、里斯本、米蘭同馬德里嘅建築物上面。為咗要做全城焦點，每個C朗影像出現嘅地方都係城市地標或者旺區；例如喺米蘭嘅著名古蹟森皮奧內門，C朗就好似對門神咁出現。至於倫敦嘅C朗就出現喺滑鐵盧車站側邊嘅大廈，紐約嘅C朗就喺曼克頓區嘅鮑厄里街嘅當眼處。
唔單止建築物係精心挑選，就連點解喺7個城市出現，C朗都有解釋，「7呢個數字對我有特別意思，一直喺我心入面，所以能夠喺世界上7個大城市一齊推出我新系列內褲嘅廣告，我覺得好光榮。自從建立自己嘅品牌後，時裝設計就成為我嘅興趣，我好享受設計呢套新系列嘅內褲。」C朗仲話，佢想用一種較有趣嘅方式去宣傳，所以決定用投映出嚟嘅巨大影像，畀各地嘅粉絲一個驚喜。既然C朗咁鍾情創意，我求大俠又幫C朗度吓橋，其實佢女友艾琳娜都成日做內衣模特兒，不如下次試下情侶檔上陣，出番套情侶內衣都好喎。
哥國神龍正式登艦
另外，C朗下季喺皇馬又多位新隊友，皇馬周日宣佈，由利雲特簽入哥斯達黎加門將基羅拿華斯，簽約6年。據西班牙傳媒披露，轉會費為1,000萬歐元（約1億港元）。基羅拿華斯上季喺西甲已經有亮眼嘅表現，曾經喺今年3月當選西甲每月最佳球員。喺巴西世盃，佢左飛右撲，協助哥斯達黎加打入8強，大獲好評。