NBA球星保羅佐治（PG）上周五恐怖斷腳後已經做咗手術，佢老竇代佢報咗平安，不過亦都話嚟緊呢季應該唔會再欣賞到PG嘅場上英姿喇。
PG呢幾日都要留喺拉斯維加斯嘅醫院穩定傷口，K教練科錫維斯基同不敗拳王美韋達上周六就先後去咗醫院探佢，PG之後仲喺instagram上載同美韋達嘅合照，話多謝對方畀咗好多意見同鼓勵佢㖭。
或要唞年半 溜馬等抽波仔
PG老竇就話個仔𠵱家專心休養緊冇咩大礙，但都認咗下季唔使預佢，至於確實嘅復康時間表就要等佢哋周一返到印第安納普利斯先可以再作診斷。而曾經治療同樣斷腳嘅NCAA球員奇雲韋爾嘅醫生Patrick Kersey就話，呢類傷勢一般要12至18個月先可以完全好番晒，不過PG嘅頂級運動員體格應該可以加快佢嘅復康進度。
如果真係證實成季都唔出得，PG效力嘅溜馬就可以好似上季嘅網隊同鷹隊咁，藉住傷病球員特例，向聯盟申請以500幾萬美元嘅中產條款簽入一位新球員一季。不過損失咗呢位明星射手，溜馬都唔知可以搵邊位自由身球員頂替佢；加上球隊另一主要得分來源L史堤軒臣已經離隊，有唔少人都話班波喺新球季可以叠埋心水等抽波仔。而小馬班主古賓就再企出嚟反對NBA球員參加國際賽，話啲球員代表國家隊受傷所帶嚟嘅財政損失太大，仲建議聯盟自己搞番個籃球世界盃喎。