風靡全港嘅尖東忌廉哥9歲生日，噚日吸引逾50位粉絲同佢慶祝生日，恭賀佢成功減肥兼揚威日本，事關有日本出版商早前將佢嘅相同香港旅遊景點嘅資料，結集成書。
8個月內成功減兩磅
忌廉哥今年初開始「被接受」減肥大計，最終由原來18磅減至16磅。主人高志成根據獸醫餐單，向忌廉哥提供適量食物，結果喺8個月內減咗兩磅，笑言：「忌廉哥成日都扮儍樣叫我畀多啲嘢佢食。」佢亦成立「忌廉哥慈善基金」，希望更多人會用正確方法對待動物，至今籌得約8萬蚊，曾捐助暫託流浪貓嘅許願樹貓貓宿舍。
其實去年11月，忌廉哥已登上日本雜誌封面，深受當地貓迷歡迎，出版商決定為佢印一萬本寫真集，有份參與製作嘅塚琦由香表示，唔少日本貓迷被吸引，前往香港旅遊時專程一睹忌廉哥風采。