中環在線:趙國雄發表涼薄論 - 李華華

中環在線:趙國雄發表涼薄論 - 李華華

長實(001)執董趙國雄被譽為「樓神」,真係當之無愧㗎!睇佢為新盤大埔嵐山1期逐一拆彈就可見一斑。由劏房、不平等條約以至墳景,就算鑊鑊新鮮,佢都可以做到張無忌乾坤大挪移咁嘅視線轉移大法。
好似噚日咁,被問到嵐山有9伙撻定,佢就話首輪賣400幾伙,9伙撻定只佔約2%,好正常。跟住又話,撻定買家用幾十萬落嘅定,係辛苦儲返嚟,唔係咁易賺,應該畀啲同情心,佢仲覺得個別傳媒嘅報道對買家涼薄。
對於「趙氏涼薄論」,我哋一齊回味佢早前嵐山開售前嘅回應。首先被問及不足200呎劏房,佢答:「我哋最細嘅單位177呎都唔係好細,如果劏房有咁大,咁住緊劏房嘅市民會好高興。」
跟住被問到嵐山有墳,佢話:「其實見到個墳,咪見到墳囉。新界好多地方都有墳,我喺粉嶺打高爾夫嘅時候,好多時都打咗落人哋個墳,咪行返落去,執返個波上嚟。」呢種懷有同情心嘅回應,真係唔係人人可以做到㗎。