香港政局之所以令人厭惡，乃源於梁振英政府及建制派那種「低水平」政治鬥爭及小學雞式動員手法，呢種攬炒式鬥爭，始於2012梁上台後。
首先登場是立法會，由元秋、Dr Tree Gun、鼠王芬三人組率先彈起，用出位言論對付長毛，以往建制派重炮如陳鑑林、劉江華即使措詞強硬，同泛民議員火併，也總會顧及議員形象及公眾觀感，呢種議會文明乃由英治時代一直流傳下來，但「爆Seed三人組」全不顧及政客形象，只求用泥漿摔角方式互片互劈，傷敵一千、自損八百，在所不惜。
議會外一樣複製相同戰略，你搞社運我又搞社運，佔中有七十幾萬人全民投票，我又求求其搞個簽名運動，務求人數多過你，完全唔怕核突，做法乸西，受傳媒挑戰，一樣公開大言不慚，當社會文明標準冇到，而更可笑係特首高官唔怕「有異味」，當你班市民白癡，公開表態簽名「反佔中」。
佢哋之所以唔怕核突，用愚民方式搞政治，係因為最終只要控制到媒體出街如何報道、動用「五毛打手」專業地在網上討論區、各大online傳媒留言，最終謊言講足一百次就會變成真實。只要CCTVB每日新聞報道「今日反佔中簽名運動人數已超過一百萬」，而隱藏咗簽名過程乸西馬虎，唔去質疑簽名運動公信力，愚民政治就已經成功。香港傳媒大部份已淪落為宣傳機器、小罵大幫忙，適當地將愚民政治的活動及動員新聞，給予較重要位置及較長篇幅，久而久之，便會形成一種「維穩」輿論形勢，將泛民及佔中運動孤立。
愚民政治要成功，猶如內地歷次群眾運動之所以星火燎原，取決於社會中產階級，因為中產係最有條件去質疑、批判愚民政治的力量。內地六、七十年代根本冇中產，所以容易俾民粹式宣傳洗腦及指揮動員，但香港有龐大中產階級，何以會出現呢種愚民政治，歸根究柢，在於香港中產欠缺世界觀、價值信念，佢哋只不過收入屬中產，但價值取向同基層無異。
近年真正動員起來投身社運及走上街頭係年輕人、大專生，中產在老董年代投入政治，因為經濟衰退，負資產原因。今日香港接近全民就業，梁振英政治上為穩住中產，自然唔敢出手壓低樓價，於是中產口中對梁不滿，但唔會有進一步行動。
CCTVB愚民劇集動輒仍有廿七、八點收視，過百萬人收睇，當然唔會凈係得基層群眾，明報一連串政治風波，包括空降馬來西亞老總，七一晚停機改新聞標題事件後，仍然有一班老師、社工、公務員讀者群，再加上一班「非政治化」、「我討厭政治」嘅OL，小白領，形成一個龐大嘅「維穩」群體，亦即是張融先生口中所強調嘅「沉默大多數」。呢個保守嘅政治社會基礎，影響過去廿年香港政治發展，北京正在故技重施，將呢股保守力量推上台前，用反佔中之名爭取過來，以便形成日後支持官方「政改方案」力量。
大家唔好低估香港社會中產保守性，冇佢哋，愚民政治點會有市場？
添馬男