警察愛空姐，上演咗一幕為愛無所懼嘅愛情故事。一幀軍裝警員從後輕抱俏空姐嘅照片近日喺網絡瘋傳，身穿香港航空空姐服嘅妙齡女子，依偎喺警員男友胸前，狀甚甜蜜， 相片背景則寫有「NEED FOR SPEED HOT WEDDING 2014.11.5」字樣，估計相中男女準備喺今年11月5日拉埋天窗。
人生大事值得慶賀，而未來新郎哥愛的宣言亦令人十分感動：「由你等我完成當年27星期的警察故事，再到我見證你沖（衝）上雲霄！差不多4年！」未來新郎哥直言發生唔同空難事故後，十分擔心未來老婆嘅工作，怪責年少時未有努力讀書，未能令佢做少奶奶云云。
雖則戀愛大過天，但未來新郎哥着住警服、頭戴藍帽子，連警員編號亦清晰可見，難免惹質疑，佢自己亦宣稱「制服合照雖然可能會帶來後遺症出現」，但不諱言「一生人一次，值得的，豁豁出來，前行萬（漫）無邊際！」八方就此向警方查詢該男警着制服拍結婚照有冇違規，警方發言人話，正了解並跟進事件，如證實有人員違規，會嚴正處理。