美銀美林窩輪業務經過一年掙扎，終於決定要淡出，今個月初已經離職嘅亞太區股票結構性產品部副總裁黃書耀（Warren），據講一早有去意，雖然Warren話暫未有大計，可能要唞一唞，但據了解佢喺金融圈會有新搞作，但就同warrant（窩輪）不相關。
離職前頻出差
曾經做過6年財經記者嘅黃書耀，2006年加入瑞銀，由傳媒界投身輪場，2008年再過檔美銀美林出掌窩輪部。不過，本報早喺舊年9月率先報道，美林美銀窩輪部最後一位交易員劈炮，一度出現運作危機，據講美銀美林亦因為咁，開始有淡出窩輪市場嘅意思，但公司後來決定畀多一年時間部門挽救，但一年過後未見起色，所以最終亦都要「斬纜」。
黃書耀係8月初證實離職，有口痕友話，查實黃書耀離職前一至兩個月已經頻頻出差，喺輪證界比較少見，不排除已經有新搞作，據講黃書耀雖然會繼續留喺金融界，但就唔係輪證相關工作。