歐洲頂級聯賽喺8月會陸續開番，所以啲球隊都進行緊季前熱身賽，為新球季做準備。但德國班世界盃球星仲放緊假嘆世界，有人留喺歐洲，有人就揀去亞洲或美洲，其中同女友喺意大利薩丁島享受陽光與海灘嘅紐亞仲玩到走光露股罅㖭。
3德槍避戰首輪英超
德國喺上月13日進行嘅世盃決賽，加時贏阿根廷1:0而第4度捧盃，15號喺勃蘭登堡門同逾40萬球迷舉行完祝捷派對之後，班球星先至放暑假。阿仙奴嘅法國籍領隊雲格好通情達理，畀梅迪薩卡、奧斯爾同埋普多斯基放4個禮拜，可以喺今個月11號先歸隊，故此雲格都表明，16號對水晶宮場英超首戰，唔使預佢哋3個。但拜仁慕尼黑班球星就冇咁幸福，雖然國際足協要求球會要畀球員放4個禮拜假，不過紐亞、湯馬士梅拿、拿姆、謝路美保定同馬里奧葛斯都好識做，肯放少1個禮拜，喺今個禮拜二返拜仁備戰新球季，或者會禮拜三對美職明星隊場友賽上陣㖭。
小豬獲特准月尾歸隊
湯馬士梅拿就話：「喺8月5號之前我會好好享受呢個假期。」但係上季備受傷患問題困擾嘅舒韋恩史迪加（小豬），據聞好似特准放6個禮拜，去到8月尾先至要歸隊。拜仁嘅德國神醫禾花夫話：「舒韋恩史迪加至少要放6個禮拜，先至可以叉夠電踢新一個球季。」
咁班拜仁球星究竟去咗邊度玩呢？小豬同多蒙特後衞曉姆斯都係去咗克羅地亞，之後趁有時間仲去埋西班牙伊維薩島玩㖭；至於紐亞就同女友去完西班牙伊維薩島再去意大利薩丁島，可能佢見就快要返拜仁報到，臨尾玩盡啲，搞到喺薩丁島走光露股罅。至於今夏過檔皇家馬德里嘅卻奧斯就去咗西班牙馬略卡玩；佢嘅隊友基迪拉就去咗新加坡度假，仲俾球迷認出，同佢影相留念㖭。