今屆喺格拉斯哥舉行嘅英聯邦運動會去到尾聲，保特同戴利兩位最大牌嘅運動員上周六就齊齊出動，超晒班嘅佢哋亦不約而同，順利贏到金牌。保特喺男子4x100米接力決賽仍然係幫牙買加跑最後一棒，佢接棒時仲落後緊畀英格蘭，但係一發揮佢本人快如閃電嘅速度之後，對手只能夠食塵；最終保特就為牙買加以破大會紀錄嘅37秒58衝線。至於代表英格蘭出戰嘅跳水王子戴利，上周六喺男子10米高台決賽亦不負眾望，以總成績516.55分贏得金牌，比銀牌嘅馬來西亞選手高80幾分咁多。輕鬆衞冕呢個英聯邦冠軍之後，戴利就自信心爆棚，話覺得自己喺兩年後嘅里約奧運有力挑戰中國隊喎。