現年42歲的杜汶澤，身形甚具彈性，隨他控制時脹時瘦，去年他為電影《3D豪情》的男優角色狂操六嚿腹肌，體重降至138磅低點，拍完戲後，他抵不住美食誘惑，體重時有上有落。早前阿澤放假遊美，當地西餐令他增磅，雖然他警覺與老婆田蕊妮以走油青菜烚雞餐平衡，但都無補於事。
阿澤大前日飛大馬開工，起行前連日食唔停。上周三，他為田蕊妮煮大餐，還留言：「今晚整多餐，下個月你（田蕊妮）就靠自己！」翌日則安排為母親Diana外出晚飯賀壽，海鮮拼盤加牛扒食到舔舔脷。放縱狂吃的阿澤，現在體重回升到158磅，他甫抵大馬後也放縱大嘆肉骨茶和芽菜雞，昨日他在facebook貼開工飯盒：「拍戲為咗乜？人哋我唔知，我就只係為咗呢啲。」阿澤自問要求簡單，辛苦搵來志在滿足口腹之欲，喪吃後他都自律做gym消脂，昨日他說：「暫時我冇角色要騷肌肉，喜劇演員可以唔使好瘦，《豪情》先例外。」
採訪：楊定
