體壇拾趣：老虎發爛渣向攝記爆粗

喺美國俄亥俄參加緊石橋高球邀請賽嘅老虎活士，成個比賽都發揮得麻麻，喺上周六嘅第3日比賽，去到第6洞仲發爛渣，對住個攝影師話「唔該畀X啲空間我啦」。雖然個攝影師係跟得太貼，阻住活士揮桿，但話晒電視直播緊，活士無啦啦咁爆粗，真係教壞細路。呢日佢就打出高標準兩桿嘅72桿，經過3日嘅比賽總成績都只係並列第36位，要衞冕睇怕冇咩可能喇。