中環街上碰到鐘錶廠商L與老婆仔女一齊行街，記得以前在馬場遇到佢，佢梗係一個人嘅，今日見到佢一家四口，相信係暑期家庭團聚啩，一問，果然係，廠商L笑到四萬咁口話：「大仔在哥倫比亞大學升三年班，GPA達3.9，細女申請美加大學，間間都收，現在決定入讀柏克萊，老婆大功告成，可以返香港咯！」L太嘅職責就係在多倫多陪仔女讀書，直至升上大學為止，廠商L就做咗六七年太空人，好咯，L太話可以準備賣屋回港，計埋滙水與屋價，賺咗一大筆，足夠補番過去幾年嘅移民讀書費用。又有咁醒嘅，咁多港人仔女去加拿大讀中學，有幾多個可以入到哥倫比亞或柏克萊呀？問L公子：「媽咪係唔係Tiger Mom？」L公子答：「唔係唔係，Amy Chua與媽咪完全唔係同一類人，媽咪唔逼我地嘅！」
即刻與廠商L講番，聯合書院嘅大師兄昌哥嘅公子在溫哥華讀中學，去年秋天亦係入咗柏克萊，不妨搵昌哥聯絡吓，等下一代在校園可以見吓面。昌哥當然係投資高手，送子到溫哥華讀書，買埋屋俾佢住，兒子去咗柏克萊之後，將溫哥華間屋賣出，賺了一大筆，兒子留學算係免費，我地有時話人地駛唔駛咁豪呀，啲強國人往往買埋間屋或一層樓俾子女作留學宿舍之用，原來有數得計，樓價升得急就賺埋留學費用㖭。廠商L知道一位內地富商，三年前送雙非太太來港產女，今年知道女兒抽籤入到銅鑼灣著名女校幼稚園，立即到禮頓山搵樓，咪又係呢個想法，不過呢位內地富商更加巴閉，已買下一架小型私人飛機，預備隨時隨地可以來港探妻女喎！
當然在外地買樓，唔係一定可以賺嘅，但過往十年來，在一啲大城市如倫敦、洛杉磯、雪梨、多倫多、溫哥華、紐約等留學城市，如果為咗留學子女居住當地而買樓嘅，結果都係賺得幾和味，既賺樓價，又賺滙價（美國除外），補足子女學費有餘。歷史可否重溫，以後十年又會點，冇人有水晶球，睇唔到。大城市樓價係咁升，自然擴大貧富差距，有錢買屋之人變咗免費留學讀書，無錢買樓之人就欠下一身學生債（student loan），真係越窮越見鬼，越富越風騷。想迅速消滅此現象？好易啫，係咁加息，等股市樓市跌到四腳朝天囉。