前一段日子世界盃，唔少鬚眉男兒，全程投入四年一度的盛事，一日兩三埸，唔難估計，嬌妻也被冷落了，看了一篇報道話ED（男性勃起功能障礙），市場風雲再起，唔知同世界盃有冇關，但就肯定同「金戈」有關。白雲山（874）隻仿偉哥（Viagra）藥，原來個名叫金戈，雖然擺明係炒偉哥，但係鐵馬金戈嗰種征戰天下嘅英雄感，有可能更啱內地消費者的口味。
講開偉哥同打仗，記得2008年《華盛頓郵報》有單唔知真定假的報道，話美國中情局官員送咗幾粒藍色小藥丸畀一個阿富汗首領，而過咗幾日之後，首領好開心咁返嚟，將好多有關塔利班的重要情報送畀中情局官員，順便向中情局官員要更多的藍色藥丸，這個藍色小巨人，自然係威而鋼──偉哥。
偉哥喺床上同戰場上建立奇功，固然係勁，而一眾仿偉哥雖然冇份上戰場，喺股場上亦都唔遜色。無他，正牌偉哥玩咗咁多年，股價一早就升到高位，但偉哥喺英國的銷售專利權，已經喺舊年6月到期，即其合法壟斷期已經結束，其他藥廠可在仿偉哥藥物名稱加入昔多芬（Sildenafil）幾個字，本小利大，利潤更有憧憬空間。
事實上，偉哥生產商輝瑞（Pfizer，PFE），股價喺5月初急跌後，走勢都係反反覆覆，近排仲跌到九個月低位；相反，偉哥的主要對手，生產犀利士（Cialis）的Lilly藥廠（LLY）同埋生產樂威壯（Levitra）的拜耳（BAYN），近排股價都回咗少少，但其實分別係接近九年高位同埋上市新高，同偉哥相比真係榮辱互見。
中國專利保護一完，白雲山嘅金戈就審批完畢，而除咗白雲山外，申報國產偉哥的企業還包括樂普藥業、廣州朗聖藥業、深圳海王藥業、羅欣藥業（8058）、常山藥業等十多家藥廠，我覺得，當局係有心放內地藥廠出嚟同外國藥廠打過，金戈推出之後，其他偉哥都會好快推出，等中國男人同中國貨一齊站起來。
銷情未知 白雲山先興奮
據內地報道，內地正牌偉哥十片裝零售價係965元，即係一粒藥丸100元，唔係一般人買得起，所以治療ED藥物嘅市場一直都未有壯大起來；而據知，仿製藥價錢通常比專利藥便宜八成以上，即係十元八塊一粒，可以滿足呢個長期不被滿足嘅市場需求。
金戈賣唔賣得未知，但股價就像吃了藥幾日升了兩成，短線嚟講，應該有一段威風，挑戰3月初高位30元左右，但對白雲山的推銷能力，依然信心不足，可炒不可揸也，相反對羅欣藥業更有信心，就算沒有仿偉哥，它也擁有82項專利，可謂進可攻退可守。
輝瑞股價就連炒都無得炒多年食老本，之前賣得貴，係因為專利保護，專利一去就要鬥新產品，先前聽聞出了支威而鋼噴霧就令人啼笑皆非，試諗諗每個去老蘭蒲的男士都十足世界盃球證般背脊孭住支嘢，就真係蔚為奇觀；打得火熱，情到濃時，等等！等我攞支嘢出嚟先，大佬，射罰球咩。
張士佳
註：筆者並無持有以上股票