中國人一向鍾意認親認戚，阿里巴巴創辦人馬雲嘅知名度咁高，內地同胞自然搶住嚟認。話說佢喺自家app「來往」埋怨，有人冒認係自己嘅北京私人司機，仲品評馬雲嘅談判技巧，覺得佢傾生意太過草率，每次都係笑住傾電話，激到馬雲講咗句「nnd（網絡語言『奶奶的』嘅拼音縮寫）」。
馬雲話，近年突然多咗好多不問真假嘅「親戚朋友」，有表哥表弟、舊同學、御用風水師、契爺等等，渾水摸魚問公司攞錢。最精采嘅，係有人試過扮馬雲太太張瑛，以第一人稱寫文章，「大爆」馬雲與家人嘅相處之道同創業辛酸史。
唔單止中國人，最近連韓國媒體都想引入馬雲概念，話阿里巴巴、軟銀想入股用戶突破4.9億人嘅LINE。不過，母公司NAVER嘅首席財務官喺業績會就一口否認咗。樹大招風，應該就係咁解啦！