為咗反佔中，你可以去到幾盡？被譽為最美麗港姐嘅朱玲玲，僅限動手不動口！佢噚日同「梁粉」老公羅康瑞去到中環嘅「保普選反佔中大聯盟」街站簽名反佔中，當老公羅康瑞請佢同傳媒講幾句、發表反佔中嘅感受時，朱玲玲一味擰晒頭，只叫另一半「你講啦」，公開請老公食檸檬！
大聯盟抄佔中橋
朱玲玲噚日一身恤衫長褲，帶晒名表、鑽石耳環，化個靚妝攞住個LV到中環華人行外，同羅康瑞高調喺鏡頭前簽名反佔中。羅康瑞聲稱一早想簽名反佔中，因為開會同身體不適先拖到𠵱家；問及反佔中原因，都係拋出保障「經濟、和諧、法治」等「標準答案」！
當佢講完後，就邀請跟得夫人埋去咪前同傳媒講幾句反佔中感受，點知老婆唔領情，點都唔肯開金口。羅康瑞就話朱玲玲係想主動嚟交表格，暗示太太冇被迫。
查實大聯盟真係充滿強國精神，似乎以抄橋為榮！人哋和平佔中運動以小女孩唱嘅《問誰未發聲》為主題曲，感動萬千市民；反佔中早前有樣學樣，搵嚟一個年紀相約嘅小女孩做8.17反佔中大遊行生招牌。
噚日大聯盟召集人周融仲話呀，佢哋嘅網上簽名系統被攻擊，乜同和平佔中全民投票遭黑客入侵咁相似嘅？但周融話只會向警方備案，唔會報警，因為攻擊時間太短，傷害唔大，聲稱已經將黑客入侵多咗嘅3,000個簽名剔除，真係巧公平公正呀！
李八方
mailto:[email protected]