由鍾漢良、陳意涵、薛凱琪等主演的電影《閨密》正在內地上映，劇情講「劈腿男」鍾漢良在婚前偷食。前晚天津一間戲院播《閨密》時發生真人版捉姦，據目擊者透露，當播出陳意涵遭男友背叛的情節時，突然有孕婦拿鎚仔現身，痛擊正與小三睇戲的老公，現場血迹斑斑。
《閨密》導演黃真真昨接受本報電話訪問，坦言現實中好多男人搵小三，電影故事講小三話題，她說：「女人睇到有共鳴，希望大家睇電影時，尤其女人要自愛堅強。」覺得觀眾受電影影響捉姦？她說：「如果我係大婆，都會打老公，老公唔好先會搞女人，不過我套戲冇打人情節，但大婆睇到可能有睇法去捉小三。」至於在電影中飾演陳意涵閨密的薛凱琪則在電話說：「劈腿係唔啱，但如果搞出人命，對媽咪同BB都唔好，我唔容許有小三，但每個人都會做錯，如果男仔即刻道歉，我可能會畀機會。」電影於內地上映4日，累計票房逾8千萬人民幣，香港將於本周四上映。
採訪：鍾國仁
