兩男同時愛上一女結局係個嬲字，但如兩位成功男士齊齊愛上同一本書呢？微軟創辦人蓋茨同股神畢菲特得閒會睇書，佢哋異口同聲話由12個嘅商業故事組成嘅《Business Adventures》，值得一睇再睇。本書由John Brooks喺60年代撰寫，股神睇咗先。後來，蓋茨有次問股神有冇好書推介，股神推薦完仲借埋自己本珍藏畀蓋茨！蓋茨閱後感係，讓佢明白建立一門強而穩健嘅生意，基本法則不變，就係要遇上對的人。無論產品有幾咁絕頂，生產同推廣計劃幾咁好，要推行兼搵到錢，最後要由「對的人」去做。
書中12個故事提到四個大道理，連蓋茨都話終身受用。首先創業者要創意十足，其中一個故事係辦公室經常用到嘅影印機Xerox，其創辦人決心搵方法取締油印機，除咗為大家返工帶來革命性改變，仲喺創立後五年內搵到5億美金。第二，產品未出得街，切忌事先張揚。第三，建立良好企業文化，如搞好慈善捐獻活動、靈活完善嘅員工福利均不可缺，除咗提升士氣，亦幫公司樹立良好形象。蓋茨喺12個故事中，最鍾意係1958年美國福特汽推出Ford Edsel嗰個，管理層一意孤行影響大局。好似福特管理層諗住做調查，為當時美國中產度身訂造一架私家車，點知俾管理層一句「我鍾意咁」，歷時兩年嘅調查化為烏有。而當年推出嘅 Edsel當然無法贏取市場歡心。
C+B
本欄逢周一刊出