車路士今夏唔同老臣子林柏特續約，最後林伯遠走美國，投奔美職聯新球會紐約城。
以為林伯就咁退出主流聯賽？未必，佢下季好可能唔單止留喺英超，仲會同車路士對着幹，幫爭標勁敵曼城手！
上半季或被紐約城外借
由於紐約城係曼城嘅衞星球隊，加上美職聯新球季要到出年3月先開波，所以喺嚟緊半年，林伯會被外借去其他球會。英國傳媒披露，林伯好似嫌棄澳職，唔肯同新隊友韋拿一齊去墨爾本城（呢支都係曼城嘅衞星球隊），於是就好大機會選擇車路士嘅爭標死對頭曼城。
我求大俠心諗，可能林伯唔認老，想喺英超證明畀車路士睇，佢仲好有能力，要車仔為放棄佢呢個決定而後悔。如果林伯真係借去曼城，唔單止可以踢英超，仲可以踢歐聯，有助佢繼續入選英格蘭國家隊；嚟緊9月21號，佢更有機會喺聯賽上陣對番車仔，畀啲顏色阿巴莫域治同摩連奴睇。
林伯早前都話，佢好想保持住上季嘅狀態，咁最好嘅地方當然係返英超，「無論係我自己操，定係跟球會，我要繼續最高水平嘅訓練，就睇吓下一步會點。」另外對於曼城嚟講，都係一件好事，大家都知「藍月亮」外援球員多、本土兵少，林伯嘅加盟就可以幫曼城符合英超、歐聯對本土培訓球員嘅要求。
車路士今夏唔同林伯續約，我求大俠都戥林伯唔抵㗎。可能有人話車仔要年輕化，所以先裁走36歲嘅林伯，但又點解釋佢哋一個屈尾十就簽番36歲嘅杜奧巴返嚟呢？大家都係36歲，大家都喺今屆世盃做後備多，大家都係車仔老臣子，點解一個被放棄，一個就可以返嚟呢？
反轉豬肚車迷燒衫
有啲車仔死忠球迷一聽到林伯勢將過檔曼城，即刻火都嚟！有人即刻燒咗林伯件車仔波衫洩憤，而更多人就喺網上留言怒插林伯，例如「林伯，我對你好失望，叛徒！」、「如果林伯真係幫曼城上陣對車路士，無論佢以前為我哋做過咩，佢都係二五仔！」、「喺我眼中，林伯已經死咗。」等等，真係冇面畀㗎！