【壹週刊】真係估你唔到，世仇都可變老友！話說上個星期日（七月廿七日）崩牙駒六十大壽，佢喺澳門君悅酒店筵開一百二十席，我地都收到請帖，咁當然要去賀一賀啦。當晚氣氛熱鬧，崩牙駒例牌興奮高歌，但當晚重頭戲，竟然喺崩牙駒既死敵「摩頂平」踩場！廿五年前，傳聞崩牙駒喺一單謀殺案，曾以證人身分頂證摩頂平，搞到摩頂平着草他鄉廿年，四年前才回到濠江，照計摩頂平理應憎崩牙駒憎到入骨啩，當時仲傳佢返來係為復仇。
當晚摩頂平在場飲到啤啤夫，仲要兩個大漢摻扶，當崩牙駒上台獻唱嗰陣，摩頂平突然衝上台，以為會爆大鑊，點知原來摩頂平想攞咪，佢同崩牙駒、澳門「大家姐」司徒玉蓮、九江街14K「立章」合唱《有誰共鳴》。摩頂平唱歌時拖實崩牙駒，二人又嚟江湖式豪邁擁抱，大家姐睇到眼濕濕，其實喺澳門搞賭廳，都係搵錢至上，鬥氣仇殺冇着數，乜嘢新仇舊怨都一筆勾銷啦。
iPhone版下載： http://goo.gl/1SDaWF
Android版下載： http://goo.gl/xfQS8D