牙買加飛人保特果然牙齒當金使，上周五喺格拉斯哥舉行嘅英聯邦運動會，有落場跑4x100米接力預賽最後一棒，結果輕鬆首名衝線，帶領牙買加殺入決賽啦。不過焦點就喺賽後，保特接受訪問時寸爆BBC女主持Gabby（圖），話前一日聽聞個女主持話英聯邦運動會，就算冇咗自己同隊友禾漢比歷克，一班觀眾都會照樣咁enjoy。
最搞笑嘅係保特講完呢句說話之後即刻指住個鏡頭話：「冇錯，我係同你講緊嘢，係你！」跟住又扮鬼臉同做搞鬼動作。同日嘅另一個焦點人物，就梗係早前傳玩完英聯邦就會退役嘅英國跳水王子戴利啦。不過佢就冇保特咁威喇，喺男子雙人10米高台僅僅以0.18分之差輸咗畀澳洲嘅組合，只係攞到個銀牌。