大家仲記唔記得香港九十年代嘅經典鬼片《陰陽路》呢？其實呢套戲唔止幕前多鬼，幕後都有好多故事o架。
動鬼故第一集，就由「鬼王」雷宇揚，講一個當年鮮為人知，佢親身經歷嘅鬼故。話說當年拍《陰陽路》經常會係墳場取景，其中一場要喺寶福山拍兩日通宵戲。當時劇組中有個為人開朗，成日同雷宇揚有講有笑燈光師阿華，喺第一晚拍最後一個鏡頭之前，突然面有難色，全身冒汗。第二晚仲唔見咗人。大家都以為佢病咗啦，點知第三晚去另一個拍攝場地，阿華又出現番，仲話俾雷宇揚知，原來第一晚，佢係寶福山去廁所，一推開門，就見到另一個自己對住佢揮手，示意佢快啲離開。嚇到阿華第二日唔敢返工呀！
雷宇揚話，呢件事係佢拍戲咁耐最奇怪的經歷呀。