高雄前鎮氣爆封鎖區裏有間賣港式燒味飯盒的餐廳。主管兼主廚係43歲港人胡志強（圖），爆炸時他幸好已收工回到鳳山區家中：「我老婆話感覺到地震，第二朝先知係爆炸，即刻趕返來睇間舖。封咗路，好似打完仗咁大堆軍隊，唔使開舖了！」
人情味濃如當年香港
胡志強在高雄居住17年，深感這是福地，唯獨今年接而連三有事故：「幾次地震都冇乜大損傷，亦冇咩大事。今年最怪，啱啱高雄飛澎湖飛機爆咗冇幾日，冇諗過地下水渠會爆到咁。而家個個話災區，我覺得還好，咁嚴重嘅事死咁少人，但真係唔想發生咁樣嘅事。周圍好多人都搬去朋友處暫住。高雄財團真唔錯，飯店有免費房畀人住，啲原住民富豪即刻捐錢。呢處啲人的確好有人情味，需要幫手時，你諗唔到佢地會咁熱情。」
1997年移民台灣的他，父母仍在香港。他感慨香港變化太大，反而高雄更似他回憶中「舊時」的香港：「香港消費、同人情味都唔同咗，同埋實在人太多。呢度反而我覺得似我細個長大嘅香港。我元朗大嘅，鄉下啲。高雄真係好似，一有假期我會開車出去玩番一兩日，有錢冇錢可以住下民宿，香港做唔到，冇啲輕鬆嘅感覺，台灣真係有」。
胡志強的燒味舖打算災後第三日就重開，繼續賣65元台幣（約17港元）一盒的叉燒飯：「周圍餐廳關晒，總有需求。最大問題係冇水，我哋要從其他地區運水過嚟。」
《蘋果》記者