「墨西哥Sam哥」，喺世盃決賽周上位嘅門將奧祖亞（圖），待業咁耐終於有新工返喇。奧祖亞上季結束後同法國球隊阿些斯奧約滿，唔搵新球會專心踢好世盃，結果表現相當出色。世盃後傳過唔少佢加盟唔同球會嘅消息，到周四終於有堅料，落實加盟西甲球會馬拉加，簽約3年。阿些斯奧喺今季已經降落法乙，Sam哥去馬拉加，球迷又會有多啲機會可以欣賞到佢嘅精采撲救。