踏入8月好多馬房已經開操，新一季形勢又點呢？邊個可以做冠軍練馬師？相信大家都記得七屆盟主蔡約翰上季衰收尾，領先至煞科日，最終輸咗個冠軍畀方嘉柏，縱使尾場盃賽蔡廐勝出「魚躍鳥飛」亦無濟於事，嗰場阿John更加谷氣到唔去接受頒獎。
經過當日嘅屈辱，阿John梗希望今季重奪寶座，的確蔡廐有條件一雪前恥，旗下高班馬「飛影」、「戰利品」、「追風駿足」、「魚躍鳥飛」上季都贏到有餘未盡，而中班馬根本好多仲未郁手；相反其餘幾個大倉，大摩高班兵力傲視同群，但佢始終放眼大賽，又全無五班馬玩少一瓣，爭冠軍永遠吃虧一啲；告東尼則倚重冇磅減兼騎功未達頂級嘅蔡明紹，加埋個表現麻麻嘅徒弟吳嘉晉，亦好蝕底。
至於方嘉柏，無論馬匹質量、馬房用人等都冇乜缺點，但近十年冇一個練馬師可蟬聯冠軍，就知喺香港要衛冕阻力有幾大。
蔡約翰仲有個關鍵人物，大家未必察覺，就係李易達如果有乜冬瓜豆腐，今季成績再唔達標就冇牌，而蔡廐副練羅富全，向來係升正熱門人選，想紮職當然要博表現，幫手搞好蔡廐馬，這亦間接令蔡約翰成績更有保證。