第一次上紅館開騷，被嘲是二打六扮巨星，門票貴過王菀之。
第一次買dream car，被譏扮潮人揸潮車，向余文樂挑機。
入行7年的「大文豪」周柏豪好惹火，上紅館、買dream car都成為熱話，現年29歲的他自認未成熟，仍然會發脾氣，惟難得年少氣盛的他，對於是是非非卻看得好開，能夠㩒住脾氣說：「我係唔會生事嘅人，世界已經好複雜好多噪音！」
撰文：余燕儀
等了7年，周柏豪將於9月踏紅館開騷，處男騷門票$680，有網友卻嘲諷：「王菀之夠係唱作歌手啦，最貴飛都係$550，我真係唔知大文豪憑乜嘢開價$680囉！」雖然被人睇唔起，但兩場門票卻沽清，柏豪說：「票價唔係我定，我唔識，當然老闆有信心先投資，佢有信心時我又有信心，買飛嘅人話番畀網友知，究竟我值唔值，呢個係我一個夢想目標，唔會理負面聲音。」
個唱爆滿爭口氣
門票首賣好快沽清，加場又再爆，是否覺得爭番一口氣？柏豪坦言：「當然有咁嘅感覺，但我從來唔係會生事嘅人，網絡世界好複雜好多噪音，我想靜靜地專心做好呢個騷，自己都算現今娛樂圈非常活躍歌手，一年派五、六隻歌，大家就算唔留意，都會唔小心聽到，我覺得係好事，上年開始好多牌子客戶搵我合作，今年再多啲。」
捱了7年，柏豪現有樓有車還做老闆有自家品牌，是否覺得做藝人唔長遠，所以搞時裝生意？他說：「都唔係，係一個興趣，爸爸未退休前做生意，由細到大聽佢講好多生意嘢，𠵱家牌子做得好好，多咗啲零用錢囉，但都忙㗎，好多嘢要兼顧。」問任職時裝買手的女友Stephanie有否幫手？柏豪避忌說：「呢位朋友有自己職業，大家會傾吓，好多朋友畀意見。」
愛撒嬌未想結婚
低調感情怕影響事業？他說：「我向來都低調，唔關事業，我想專心做嘢。𠵱家感情好開心，但結婚唔會短期事，自己都未搞掂，個人未成熟，我覺得自己仲係細路，仲會發脾氣，如果要結婚想有小朋友，我咁細路仔易發脾氣，照顧唔到身邊人，𠵱家仲係依賴爹哋媽咪，唔開心會嗲吓佢哋，如果我做老公老竇，唔嗲得阿爸阿媽，咁會好核突，我好大責任心，好享受人哋乜都問我，如果老婆有嘢問我，我要問阿哥點解決，我會覺得好𤓓！」
向余文樂學習
入行7年，柏豪早已明白娛樂圈的方程式：「永遠有嘢成功咗，好似演唱會、買車，一定係話我挑戰邊個攞嚟比較，算啦，呢行係咁，我會接受。」好像柏豪最近斥逾百萬買Benz Jeep，又被譏扮潮人揸潮車向余文樂挑機，柏豪說：「佢係好嘢我梗係學佢，我對好多嘢唔專心，有時我好佩服佢，佢對好多嘢好投入，如打波、做牌子，個個男人都想買夢想嘅嘢，唔等於我模仿佢，事實上我有學佢，大家朋友互相影響學習，我梗係學好嘢，余文樂係好嘢。潮人？我從來冇覺得自己潮，自己都鍾意懷舊嘅，我係老土底鍾意舊設計嘅車。」