本港養馬量最多的蕭百君家族，旗下馬上季合共取得十W，成績較前季14W少，亦贏唔到一、二級賽，最叻只係「格哥兒」兩勝三級賽精英碟及皇太后盃，但蕭百君話各駒上季合共贏出獎金約2,000萬，算勉強收貨。今季將繼續引入新兵，但就會一改上季購馬方針，務求爭取更佳成績。
蕭百君解釋家族會從不同途徑買馬，包括在海外搜羅自購馬，亦會在自己牧場培育馬匹來港，又或喺香港國際拍賣會入貨等，務求遇到好馬。但上季就作出新嘗試，初次購入一些曾在意大利服役的馬，例如「魔法豪情」及「卡達鷹」，價錢唔算平之餘，來港後表現亦唔算突出，只有「魔法豪情」曾火併「嘉應小子」跑第二。蕭百君話「魔法豪情」是靚馬質素極高，但佢同「卡達鷹」都有蹄甲敏感問題，可能與來港前長期在南歐嘅濕地步行有關，所以今季未必會再在意大利入貨，改為從澳紐及英愛等地引入良駒。