做得辛苦，上星期特登走咗去曼谷hea咗三日，hea就係不做任何事，朝早瞓到晏先至起身，吃過餐就去行街，無特定目標，今次住在湄南河畔嘅香格里拉，貪佢地方大，夠輕鬆，夠舒服，酒店雖舊，服務基本上仍然有傳統良好習慣，但曼谷畢竟過去大半年飽受黃衫軍示威摧殘，遊客少至，即使係老牌名店如香格里拉，好容易看到某一些cut corners（偷雞）跡象，幾令人嘆息，例如咖啡店內（Next 2 Cafe）之一格男廁所竟然無廁紙，近Gift Shop（禮品店）之廁所亦然，係五星級酒店服務不可接受嘅，Next 2之晚飯水準更加不及格（雖則早餐還好，Pastry尤佳），香宮粵菜嘅小菜值得一讚，但甜品椰皇燕窩竟然燕窩短缺，與幾年前燕窩多到滿瀉之情況，則不可同日而語。
人氣少了，酒店內之食肆要慳成本，於是捲起惡性循環，酒店食肆每晚冷清清到得人驚，反之，位於Soi Saladaeng之意大利餐廳Zanotti仍然客似雲來，晚晚爆棚，於是食物仍然有高水準，唔去唔得，已成為香港遊客集中地，左丁山粗略估計，自己在此吃飯嗰晚，全場有三分一以上食客係講廣東話嘅。
曼谷平靜無事，市面大商場回復常態，人潮洶湧，在Paragon之麥當勞，貼出告示：No Political Activity，原來係National Council for Peace and Order（國家和平秩序委員會，簡稱NCPO）嚴禁政治活動，軍人大晒，軍權至上，總之槍桿子出政權，揸槍就揸弗，泰國人大概見到示威阻住搵食，已經怕怕，覺得軍人掌權，不是異態，而是泰國常態！一般人民有此思維，不算奇事，但知識分子亦要幫埋手，軍人先至可以鎮壓任何政治活動，扼殺民主嘅箒。NCPO搵人起草新臨時憲法，泰國傳媒話返回1954「軍事獨裁年代」，臨時憲法賦予NCPO無上大權，甚麼政府都只能是軍人的應聲蟲，邊啲人起草臨時憲法呢，主其事者就係一位哈佛法學院畢業，前任最高法院首席大法官Pornphet。大法官應有司法獨立意識，點解要為軍事政權服務，草擬惡法法律為軍人踐踏人權、民主與言論自由？槍桿子係可以出政權，但若無文人筆桿子做幫兇，又未必可以持久嘅箒。