隔牆有耳:禮義廉造謠有迷魂煙 - 李八方

隔牆有耳:
禮義廉造謠有迷魂煙 - 李八方

謠言止於智者,喺最近一單造謠事件,足見民建聯呢個政黨有幾多智慧。話說民記北區支部,喺地區辦事處出咗一張通告,話喺上月29日,喺粉嶺華明邨發生一單迷魂煙事件,話有人趁一名女士㩒錢期間噴煙,拎走人哋6,000蚊咁話。嘩!海報一出,街坊人心惶惶,但實情係當日有位女子喺邨內超市買水果,懷疑未付清全部款項,同一名男子爭執,搞到要報警求助,其間女子話交咗6,000蚊畀人,但有人就唔見咗影。呢單嘢越傳越誇張,話有女士遇到迷魂黨唔見咗6,000蚊。勢估唔到,民記將謠言當真事嚇壞街坊。有心水清市民醒起,民記早排都出過通告叫大家唔好亂發懷疑係謠言嘅短訊,估唔到佢哋有口話人,冇口話自己。