葛民輝同林海峰嘅舞台劇《笑之大學》，今日開始喺灣仔藝術中心演出18場，噚日佢哋做最後綵排。對於近排麥當勞遇上公關危機，佢哋曾做麥當勞代言人，加上麥當勞香港區一姐黎韋詩曾同葛傳緋聞，阿葛不但冇幫手解畫，仲抽水表示唔會將舊嘢當新貨賣。
阿葛噚日繼續以前排彭順嘅鬚根look現身，佢表示劇中年齡應該比林海峰後生，所以遲啲有機會剃鬚演出，佢話：「呢啲係做現場劇好玩嘅地方，可以有進步地方。」
「叫佢嚟支持我」
當阿葛被問到會唔會慰問曾傳緋聞嘅黎韋詩時，佢即刻抵死咁講：「慰問佢？佢都未慰問我，叫佢嚟支持我啦，不過唔使送過期雞嚟。我哋都唔會將過期嘢repack（重新包裝），話自己喺新鮮。」提到香港嘅應變唔及日本嘅麥當勞時，佢就話：「關唔關佢（黎韋詩）事㗎，咁要搵我哋劇團個日本繙譯問問。件事唔係好關麥當勞事，其實佢哋都係受害者。」又認為麥當勞會有自己嘅方法應對危機。林海峰認為每一個災難最 後都會有生還者，佢話：「最後能夠生存嘅都係最強，之後就會成長同埋有進步空間。」
撰文：馮仁昭
