幾位朋友吃午飯，因其中一位好耐冇食過翅，講明要去上海總會食會長翅（即火瞳雞湯翅），於是搵左丁山卜咗一間房，吃得高興之餘，朋友A突然話：「你前幾日講奧巴馬籌款，我俾啲相你睇吓。」哦，相片中人就係奧巴馬。奧巴馬身為總統為民主黨籌募經費，不惜親自走到紐約，出席一個晚飯宴會，飯局不在大酒店舉行，而係曼赫頓上城區東區，所謂Upper East區，豪宅區也，這裏有不少高層住宅大到無倫，東邊窗睇無敵克遜河河景，西邊窗欣賞無敵中央公園景，奧巴馬就係應主人之邀，主持飯局，請來三十零位客人，是晚籌款一百萬美元，能夠為奧巴馬安排籌款飯局，或者有面子請到總統大駕光臨嘅，自然係巨富。
朋友A之親人就住在同一大廈，總統駕到，苦了住客，大批紐約市警察、特工、保鑣殺到，團團包圍，水洩不通，住客返屋企要搜身不特止，還要由保安親自「護送」回家，直至閂埋門為止。之前當然有大量特工將全大廈由頭搜查到尾，擾民到極。
香港要搞民主，搞政黨政治，大概亦要建立一套政黨籌款規則，不似現時咁神神秘秘，民建聯每年經費過億元，來源有公開（如張曉明題字）有秘密，如果有黑客入侵民建聯電腦，如入侵黎智英電腦一樣，大概會揭露不少新聞。泛民最近因黎智英捐款之事，備受抨擊，倒不如順勢在立法會提出用P&P（特權法）調查全港所有政治團體之捐款活動，無論是佔中派或反佔中派，皆應在調查之列，讓所有不同界別嘅捐款暴露於陽光下。
動漫節開幕之日，記者G從灣仔地鐵站天橋行去會展，見到「反佔中簽名攤位」人多勢眾，在天橋延綿不絕，但當時現場工作人員多過簽署人士好多，記者G不禁讚嘆：「周融一班人真係有錢，可以搵到咁多人開工！」朋友A到上海總會食翅之日，在華人行前面發覺有不少人提早佔中「反佔中」，佔領街道猛叫人簽名反佔中，以佢所見，又係工作人員多過簽署人士，佢又係同一句評論：「周融佢地真係有錢」，搞一個如此在港九新界「洗街」之簽名運動，真係無財不行，捐款人肯定唔止一個，係有好多條水喉射住嘅，如果只係搵到一百萬人簽名（包括遊客與小童），每個簽名嘅成本都幾貴㗎！