現年29歲、兩女之母的徐淑敏（Suki）今日將入院生第三胎，雖然腹中再懷囡囡，追仔不成功，但Suki仍期待小B女出世，她昨日趁着入院前與老公黃浩（Kenny）到中環撐枱腳，撇下兩名女兒過「三」人世界。肚大如籮的Suki昨日與老公外出搵食，她行動非常緩慢，Kenny體貼傍實，同行還有黑人保鑣。
Suki有過兩胎的剖腹經驗，今日生產心情輕鬆，她昨日在電話中說：「我希望BB快啲出嚟，今次我陀得冇咁輕鬆，始終年紀大咗，聽日入院要帶嘅嘢我都執好晒。」
考慮再追仔
Suki連生3名女兒，日前還說要封肚，但現在有意改變主意，她說：「睇吓自己能力再決定。」會否考慮到外國選擇性別人工授孕？Suki說：「我會考慮㗎，追個仔完滿啲，我接受唔到生四個女，𠵱家屋企都成屋女人啦。」Suki明日生完便要留家坐月，所以Kenny昨日特別帶老婆出外用餐。
下月牛一的Suki，到時剛好坐完月，老公Kenny已計劃獎勵帶她出埠旅行，Suki期待說：「我同老公，仲有細女都係同月生日，生完就可以一齊慶祝啦。」
採訪、攝影：朱志聰
