今時今日做職業足球員，如果踢得出色之餘賣相又有番咁上下，除咗落場踢波之外，真係仲有大把搵錢機會。巴西前鋒尼馬目前仲養緊傷，但喺呢兩日都不忘旋風式去日本，除咗簽贊助合約，仲上咗一個電視節目，喺一位女粉絲心口上面簽名，搞到大家好鬼high。
赴日拍廣告掘金
尼馬喺世盃決賽周背部受傷，背脊骨骨裂；巴西喺臨尾兩場波冇咗佢嘅情況下接連慘敗，加上最近又俾巴西新帥鄧加點名批評，話尼馬唔會唔開心就假嘅。不過森巴小子好快又重現笑容，雖然目前仲養緊傷，但決定應約照樣前往日本，仲向日本粉絲留言話：「希望向日本嘅支持者展示一下充滿活力嘅形象。」尼馬經過今夏世盃之後人氣急升，據講佢個微博嘅關注人數已經超過1,300萬人。
按原定行程，尼馬原本會喺星期三去到日本，到今日離開，但係有延誤令佢喺噚日先到埗。嚟到冇耐，尼馬就嗱嗱臨去富士電視台嘅錄影廠，出席叫《バイキング》（High Noon TV Viking!）嘅中午直播節目。星期四當日嘅主持裏面，仲有日本人氣女子組合E-girls嘅Ami。尼馬見到有唔少粉絲，佢亦好識做，即刻同其中一位着住巴西波衫嘅女粉絲簽名，仲要簽喺佢心口上面，搞到姐姐仔即時high到尖叫。主持人Ami都睇到好興奮，拍晒手掌咁，不過佢就冇勇氣畀個心口尼馬簽名嘞。
除咗上電視節目，尼馬此行更重要嘅目的梗係搵錢啦。佢嚟到日本會同一間日本高級寢具公司簽贊助合約，幫佢哋拍攝床褥廣告。尼馬仲向球迷報喜，話自己已經好得七七八八：「情況好好，傷勢已經有好大改善，接近100%好番晒。」尼馬喺噚日仲要出席一個公開活動，有成5,000人嚟到，舟車勞頓加上行情緊密，佢真係好攰，加埋拍廣告前遇上塞車遲到40分鐘，有關方面都好照顧佢，取消咗原定喺拍廣告前嘅公開影相活動。搞掂晒啲嘢之後，「尼馬旋風」好快就會飛走，繼續養傷，希望盡快康復再次上陣。
