保普選反佔中大聯盟發起人周融噚日預告，下周日喺全港報章，將會有「驚天動地」效果嘅反佔中廣告，但《蘋果日報》同《am730》除外。周融話《蘋果》因為「立場問題」，聯盟一直唔會落廣告；咁點解唔吼《am730》？佢就話一直都有幫襯，但近日想再落廣告時，遭對方加價四倍，質疑該報「可能唔想接呢個廣告都未定」。
八方噚日向《am730》老闆施永青查證，施老闆話呀，對全部政治廣告都會加價，唔係針對反佔中㗎，強調早前反國教嗰排已經係咁，原因係登政治性廣告「順得哥情失嫂意，風險好大」，坦言希望盡量少登，「如果今次加價阻嚇唔到，我會再加」。