練馬師Gibson高伯新呢一日喺晨課露面，記者見到佢，當然捉住佢問「事事為王」嘅近況啦！
「事事為王」係上季香港盃盟主，嗰場係全港最高獎金賽事，當大家都認定隻馬前程似錦之際，上季中卻因為腳傷提早退役，運去澳洲打種；而高伯新仲幫「事事為王」整咗個facebook fanpage，同大家互相交流吓。Gibson就話目前正為「事事為王」揀選緊一啲合適嘅雌馬交配，好有信心將來佢嘅子嗣質素一樣咁高，仲話心願係將此駒嘅後裔運嚟香港，好似「事事為王」咁贏打吡同香港盃，咁就真係一時佳話嘞！
其實「事事為王」真係好巴閉，歷來唔少香港馬退役後運到澳紐打種，但現時配種費都唔超過一萬澳元，惟獨「事事為王」高達16,500澳元，大約12萬港元，零舍高一截，以新種嚟講算幾高吓，堪稱財色兼收。而排第二嘅就係「俊歡騰」，贏過07年經典一哩賽同打吡預賽，在港累積九捷，現時配種費都係9,900澳元咋，低過「事事為王」近半，由此可見育馬業界對「事事為王」嘅重視程度！