恒隆系噚日開業績記者會，兩大核心人物「雙陳」──董事長陳啟宗（Ronnie）同埋董事總經理陳南祿（Philip）即場表演咗場「唱雙簧」，一方面唱好恒隆（101）近年收租物業嘅成績突飛猛進，Ronnie亦暗地裏讚緊自己眼光好，冇請錯Philip呢名猛將。
話說噚日Philip向記者解釋恒隆係一間以收租物業為主嘅地產商，Ronnie就打蛇隨棍上，問到Philip喺四年前由太古A（019）轉投恒隆嘅時候，集團嘅收租面積、收入係幾多。唔知Philip真喺咁厲害，定係之前早有準備，竟然即時講到答案，話集團嘅收租面積同收入喺短短四年間多咗成倍。
陳南祿加盟後股價跌16%
眼見Ronnie同Philip一問一答「唱雙簧」咁過癮，台下有記者行家亦忍唔住要加入，起哄話Philip幫恒隆收多咗成倍租，但係人工就冇加多成倍喎。從來嘴巴不饒人嘅Ronnie一時間都唔知點答，佢反問明年業績如果唔好，係咪要減番佢嘅人工。
話就話恒隆呢幾年收租樓面多咗，但係睇恒隆股價，小股東似乎唔多受惠到。Philip喺2010年7月中加盟恒隆，恒隆股價當年尾曾經創過36.6元高位，但係之後都喺30元樓下，噚日收24.05元，較Philip加盟前跌16%。反觀佢離開太古後，太古股價喺呢四年累升53%。
李華華
mailto:[email protected]