手機上網熱爆，加埋內地4G開發，場內移動網絡設備商俊知（1300）肥仔水，得4倍PE，超吸引。
俊知主打移動通訊射頻同軸電纜，同漏洩同軸電纜，內地排名第一，三大龍頭電訊商兼係俊知客戶。
另外，內地今年開展4G，根據俊知講，4G網絡頻譜較高，需要更多同更密集基站，作全面覆蓋，對射頻同軸電纜產品需求，預期更加龐大。俊知係行內龍頭，面向4G市場，嚟緊日子，已經坐定粒六。
今年銷售料增雙位數
又中國互聯網絡訊息中心啱啱公佈，直到今年6月底，內地手機網民突破5億大關，去到5.27億，而手機網民上網使用率，亦上到83.4%，兼首次突破個人電腦（PC）用戶使用率。又單係移動數據同流量，更分別大升咗46%同52%。
手機上網需求大，亦衍生電訊商嘅網絡擴容，為俊知產品，提供源源不絕嘅需求。大好形勢下，俊知亦將今年銷售目標，要達到雙位數增長。
唔好估咁多，俊知今年純利增長30%（上年度增長24%）咁大把，去到4億元人仔，今年PE得4.9倍。
俊知上年10月批1.15億股，畀專業、機構同其他投資者，每股3.15元。而喺港交所（388）網站權益度，大孖沙海爾喺今年4月10號榜上有名，做咗俊知第二大股東。同一日，俊知完成咗配售非上市認股權證，認購正股價，每股都係3.15元，俊知現價（2.23元）潛水近30%。
俊知亦話明，希望引入更大嘅投資者。趁任何潛在大孖沙曝光前，俊知仲喺大半年橫行底，好買定，股價只係上番上邊配股價，講緊要升40%，到時，俊知PE都係得7倍咁大把。
錢雋
細價股專家
本欄逢周二、三、五刊出