南華噚日除公佈前澳職阿德萊德聯前鋒伊雲高斯度普路斯加盟外，由厄瓜多爾球會昆卡外借嘅20歲前鋒馬杜迪亦已隨隊操練。呢位馬杜迪啱唔啱南華用就未知，但睇個樣相當「牛奶仔」，成個十零歲青年軍咁款，技術方面可能未適應，仲要觀察吓。至於幫厄瓜多爾踢過2006年世盃嘅門將摩拉就聽朝到。教練楊正光話，伊雲入球能力唔錯，亦有亞冠經驗，而球隊仲要搵個外援中堅。