做DJ兼司儀出身嘅Bob（林盛斌）密密接job，拍劇、做節目主持、又去做活動司儀，曝光率甚高，做極唔停，似足「鐵人28」。
但係鐵人都有倒下嘅時候，佢噚日喺微博話自己病咗喇﹗微博上載嗰張相，佢隻手插住喉管，睇嚟入咗廠，然後佢就自嘲：「終於收皮了！任你再犀利，再巴閉，突然嚟個發燒，感冒，喉嚨痛加扁桃腺發炎，你可以即刻收皮，但係點都估唔到要去到咁大鑊！好辛苦...」咁又係呀，「再鋒利嘅刀都有生銹嘅一日」丫嘛....阿Bob真係要休息多啲。
記者打俾Bob老婆Pearl問咗Bob嘅情況，佢就話Bob前日凌晨時份坐白車入院，雖然Pearl依家有7個月身孕，但因為好擔心丈夫Bob嘅情況都照顧咗老公成晚，而阿Bob就仍然要留院觀察，記者微信俾Bob，佢就簡單回覆:「Thank you。」