隔牆有耳:應徵港龍空姐空少攻略學韓文衝上雲霄 - 李八方

隔牆有耳:應徵港龍空姐空少攻略
學韓文衝上雲霄 - 李八方

好多少男少女夢想做空姐,一飛衝天又可以環遊世界。港龍嚟緊8月2至4日舉行招聘會,預計三日派900個籌,招聘100名空中服務員。港龍噚日舉行傳媒茶敍,由空姐空少大談求職攻略,原來喺「韓風」吹襲下,識韓文嘅求職者有優勢,因為港龍諗住加強韓國線,港客同韓國客都唔少;如果李敏鎬上咗機,至少可以直接用韓文招呼兼嗲一嗲。當然識日文都有分加啦!

男仔一定要剃鬚

現職港龍空少馮典威,1996年喺美國完成政治及人力管理嘅大學學位後返港搵工,警察同懲教署都請佢,但佢最終揀咗入港龍做空少。噚日提供少少求職心得,話男仔想入行,見工時一定要剃鬚,天時暑熱就要小心有體味,求職者最緊要做好自己兼有好嘅準備,起碼知道港龍做開乜嘢航線。
港龍機艙服務部招聘及事業拓展助理經理李文儀就覺得,應徵嘅女仔最緊要整潔,最好梗係都要化少少妝啦!佢憶述曾經有「失魂」應徵者唔記得帶學位證明,印象分當然會減啲!
19歲入行、已入職約20年嘅空姐曾穎敏,則大讚近年90後入職新人敢言兼多創意,遇上緊急情況會自發用WhatsApp群組,迅速通知同事;針對近日多宗空難,港龍就話流失率保持以往水平,冇乜受影響。

港龍資深空中服務員曾穎敏(左至右)、馮典威及助理經理李文儀教路,新手識韓文有優勢。

李八方

mailto:[email protected]