唔止學生哥有暑假放，立法會議員都一樣有暑假放。唔少議員趁住𠵱家立法會休會期間，都會飛番轉去外國充電。立法會金融服務界議員張華峰亦已經計劃好喺聽日出發，準備展開佢嘅南法紅酒之旅。
張華峰話，今次會同埋家人一齊去法國南部嘆世界，好似尼斯、康城同埋波爾多，除咗睇薰衣草，當然亦會順道參觀酒莊，品嚐法國紅酒咁。
佢話有朋友介紹咗兩個酒莊畀佢，其中一個係靚次伯（Lynch Bages）酒莊，另一個都係好有歷史嘅家族酒莊。雖然有唔少研究話紅酒有助抗衰老，但係原來紅酒嘅熱量比啤酒仲高，希望已經好有「份量」嘅張華峰唔會嘆到再脹多個碼返嚟啦！
除咗去法國，張華峰亦會去瑞士走番轉。佢話𠵱家香港越來越亂，都係出國呼吸新鮮空氣仲好喎。