【壹週刊】香港地寸金尺土，今期介紹嘅八百呎油塘居屋，兩公婆加埋囝囝三個人住，設計師扭盡六壬，巧妙運用每一寸地方，以實用取勝！
環視成間屋，係咪見唔到飯枱呢？原來個高身儲物櫃有景轟，10秒就變出魔法喇！設計師Monique話：「我哋將餐枱收埋喺櫃入面，櫃門一拉一摺就變身餐枱。唔食飯嘅時候收埋張枱，可以增加小朋友活動空間。」
全屋設計冇太多花巧，電視左右兩邊係客房同浴室，用上趟門設計，夠晒慳位！設計師Monique仲好巧妙咁幫兩隻門做咗個暗抽，「望落去似feature wall，將所有門都收埋晒！」
而屋主夫婦諗得好長遠，BB房就唔用BB床，改用六呎單人床，未來十年實夠用呀！而單人床床身仲特登整詔高咗，床下底可以用嚟擺喼同儲物箱。
最後就去參觀主人房，房間用咗風水咖啡色，床邊嘅小櫃一物多用，既係梳妝台，又是床頭櫃，仲可以做電腦台，切合屋主屋盡其用嘅追求呀！
iPhone版下載： http://goo.gl/1SDaWF
Android版下載： http://goo.gl/xfQS8D