雷軍旗下小米最近多是非，繼俾人踢爆誇大官網瀏覽人次，又涉不實廣告，俾台灣公平交易委員會罰咗60萬新台幣（15萬港元），佢噚日就喺微博認錯，大大隻字寫住「對不起！我們的確少了30台。」
事緣小米舊年12月喺台灣開賣紅米手機，聲稱只用9分50秒、1分08秒、25秒，分別賣晒1萬部、1萬部、8,000部紅米手機，合共2.8萬部，但原來每次實際賣出數量都冇咁多，實際賣出2.62萬部。
咁點解小米認錯時只係話賣少30部呢？原來係玩數字遊戲，佢將1,750部「F碼」（優先購買資格）計埋入搶購數量，F碼等於認購權，唔等於擁有者真係行使去買部機㗎喎。睇嚟小米唔算誠心悔改，難怪上載微博張相，係一張小朋友單手掩面嘅相片，睇落似無奈多過內疚。